სიმღერა
ველს სადმე შევხვდი ტურფასა
ველს სადმე შევხვდი ტურფასა,
ჰყვაოდა ია-ვარდითა,
მეუფეს მადლი ციური
იქ დაებერტყა კალთითა,
დაჩრდილულიყო ხეებით,
თაღი შაეკრა ბარდითა.
გული ამევსო სიამით,
განვთავისუფლდი დარდითა.
ლამაზი სუნი ყვავილთა
ლამაზს ბულბულის მღერასა
გაელამაზა უფროცა, –
მეტს კარგს ვერ ჰნახავთ ვერასა.
მეორეს დღესაც მივედი,
მენახა იგივ ადგილი.
თქვენს მტერს, რაც ვიგრძენ მაშინა, –
მთლად მომეშხამა წადილი…
ყოილნიც ისევ ყოოდენ,
ბულბულიც ისევ გალობდა,
თუმც მის გალობა ძლივს ვიცან,
ნაღველ-ძმარითა მწარობდა…
თვალებსა ვხუჭავ, ცხვირზედაც
მაგრა ვიჭირებ ხელებსა,
გველები შემოჰხვევია
ტურფა მცენარეთ წელებსა,
და მძოვრის სუნის სიმყრალე
დაჰქრის ტყესა და ველებსა
კომენტარები
კომენტარის დასაწერად საჭიროა ანგარიშზე შესვლა. შესვლა