სიმღერა
სიმღერა სასოწარკვეთილისა
ტიალო წუთის-სოფელო,
მაბრუნებ ათას ფერადა,
ანგელოზივით მართალი
ლამის გამხადო მგელადა.
დაბადებიდგან წილადა
მარგინე კვნესა, ჭირია,
და ჩემი თავი შენს ხელში
ქოჭებ-დადგმული ვირია.
ამკიდებ, რასაც ისურვებ,
მომძახი: აჩი, აჩიო!
საპალნეს ნუ დამიკარგავ,
გინდ მოკვდი, გინდა დარჩიო!
რაღა მეთქმევა ბეჩავსა,
უნდა გემონო ბრიყულად,
შენგან დადგმული ქოჭები
უნდა ვატარო ვირულად.
კომენტარები
კომენტარის დასაწერად საჭიროა ანგარიშზე შესვლა. შესვლა