სიმღერა
მხოლოდ ძალა გაქვს დღეს ხელთა
მხოლოდ ძალა გაქვს დღეს ხელთა,
მაგით ხარ მეტი ჩემზედა,
ბატონად მიტომ დამიდეგ,
წყალს მასხმეინებ ხელზედა.
გნებავ – მატირებ ცრემლადა,
გნებავ – მახტუნებ ცერზედა,
პურსაც ვერა ვჭამ კრძალვისგან
და შიშით თავის წრეზედა.
მოგჩერებივარ თვალ-წარბში,
ლუკმა მადგება ყელზედა;
შენ მადლობელიც არა ხარ,
როგორც შეგატყვე ფერზედა.
შენ მაინც ჩემზე ჰგულბრაზობ,
როგორც მოსისხლე მტერზედა.
ჩემი დაღუპვა გწადიან,
მიტომ მაყენებ კლდეზედა?!
გსურს, ანებივრო სვავები
ტიალ-ოხერის ლეშზედა.
ნუ შვრები მაგას, დაფიქრდი,
ხელს ნუ აიღებ ღმერთზედა.
ნუ, თორემ მარტო არა ვარ
ამა სიმართლის მთქმელია:
ვინც ავს უშვრება მოყვასსა,
სხვაც მისთვის ავის მქნელია;
თვითაც მუხთალად მოკვდება
მუხთალად კაცის მკვლელია.
კომენტარები
კომენტარის დასაწერად საჭიროა ანგარიშზე შესვლა. შესვლა